O sábado 11 de marzo, ás 10 horas, no Seminario Maior «San Xosé» de Vigo, a delegación de Pastoral Vocacional da diocese de Tui-Vigo organiza unha Xornada Vocacional para mozas a partir de 14 anos, baixo o lema «Atopeite», co que quere visibilizar o testemuño de tantas persoas que, no cotián da súa vida, experimentaron a beleza do encontro coa persoa de Xesús. Esta cita diocesana enmárcase no contexto do mes de marzo, «mes das vocacións», no que a Igrexa celebra o Día do Seminario, coincidindo coa solemnidade de santo Xosé, cada 19 de marzo.
Este encontro quere ser un espazo de escoita e acompañamento no que mozos maiores de 14 anos poden entrar nunha dinámica de discernimento que lles axude a responder os grandes interrogantes da vida, especialmente, aqueles relacionados coa vocación —ao sacerdocio, á vida consagrada, á vida matrimonial, á vida misioneira ou á evanxelización entre outros—. Neste sentido, Anxo Carniceiro, delegado de Pastoral Vocacional, expresa que se trata de crear un espazo no que os mozos, procedentes de diferentes realidades eclesiais da diocese, poidan atoparse entre eles e tamén experimentar «o agasallo de atoparse con Xesús».
A delegación de Pastoral Vocacional quere, a través deste encontro, visibilizar o Día do Seminario que se celebrará o sábado 19 de marzo baixo o lema «Érguete e ponte en camiño», para pedir, dar grazas e mostrar proximidade cos seminaristas, os seus formadores e as vocacións sacerdotais. A Subcomisión Episcopal para os Seminarios da Conferencia Episcopal Española elaborou uns materiais cuxa reflexión convida a percorrer o ministerio público de Xesús con atención para descubrir as súas pegadas na historia vital de cada persoa.
