Durante a Xornada Vocacional que acolleu o Seminario Maior «San Xosé» de Vigo o sábado 16 de marzo, o bispo de Tui, Mons. Luís Quinteiro, explicou aos mozos «que non vides a un sitio estraño; esta é a prolongación da vosa igrexa. É moi importante que, hoxe, sintades na vosa casa e marchédesvos tendo unha experiencia de familia». A delegación de Pastoral Vocacional organizou esta xornada na que participaron preto de un centenar de mozos e mozas a partir de 14 anos, co obxectivo de celebra o Día do Seminario que, este ano, a Igrexa en España convoca baixo o lema «Pai, envíanos pastores».
Tras a benvida inicial, o bispo de Tui-Vigo saudou a todos os asistentes ao encontro —novos, catequistas, sacerdotes e mesmo pais que acompañaron a mozos e mozas—. Durante a súa intervención, o prelado tudense destacou a importancia de «non depreciar o que temos» e tamén expresou o seu desexo de que «teñades un intre de oración feliz, de que vos atopedes a gusto con Deus, a gusto nesta casa, e que vos marchedes sabendo que aquí hai algo que vos interesa».
Os medos, a familia, a amizade ou o mundo das feridas son só algúns dos temas que se abordaron nos seis talleres que se organizaron para coñecer en maior profundidade diferentes aspectos da vida de Xesús a través de diferentes encontros con personaxes do Evanxeo: Xesús e Pedro na tempestade, o lago de Galilea, Xesús e o mozo rico, Xesús e o leproso, Xesús en Nazaret e Betania. Todo iso foi posible grazas ao traballo coordinado pola comunidade do Seminario Maior de Vigo e as diferentes delegacións de Pastoral Xuvenil e Universitaria, Pastoral Familiar, Pastoral da Saúde e CONFER de Tui-Vigo.
A mañá finalizou na capela do Seminario cunha oración na que houbo oportunidade de escoitar tres testemuños que tiveron —e continúan tendo— un encontro persoal con Xesús que les levou a descubrir a súa vocación: a irmá Annastasia, da congregación das Servas da Paixón, o matrimonio de recentemente casados formado por Elena e José, e o seminarista Juan González.
«Pai, envíanos pastores» foi o lema co que a Igrexa en España celebrou, este ano 2024, o Día do Seminario, para dar grazas e mostrar apoio aos seminaristas, formadores e ás súas familias, á vez que pide polas vocacións sacerdotais. Neste contexto, a delegación de Pastoral Vocacional de Tui-Vigo organizou esta Xornada Vocacional co obxectivo de crear un espazo de escoita e acompañamento no que mozos a partir de 14 anos poidan entrar nunha dinámica de discernimento que les axude a responder os grandes interrogantes da vida, especialmente, aqueles relacionados coa vocación.
Anxo Carniceiro, delegado de Pastoral Vocacional, explicou que «o mes de marzo sempre nos/nos regala unha oportunidade para reflexionar sobre a vocación cristiá á que todos fomos chamados; unha vocación que para cada un de nós se colorea cunha modalidade especial». Ademais da xornada para mozas, o 23 de marzo, ás 10.30 horas, no Seminario Maior de Vigo, está previsto un encontro formativo para axentes de pastoral baixo o título «Vocacionar a pastoral diocesana».
