O doutor José Troncoso, encargado da lectura do pregón, e o actor Manuel Maquiña portará o estandarte da confraría.
No mediodía de onte, varios membros da directiva da Confraría do Santísimo Cristo da Vitoria encabezados pola súa presidenta, Dna. Marora Martín-Caloto, reuníronse co alcalde da cidade, D. Abel Caballero, para concretar distintas cuestións ao redor da festividade do Santísimo Cristo da Vitoria. Así transmitiron o seu desexo de que a lectura do pregón do día 6 de agosto no Pazo de Castrelos sexa encomendada ao Dr. José Troncoso Durán, médico especialista en cirurxía ortopédica e traumatoloxía. Foi presidente da Sociedade Galega de Cirurxía Ortopédica e Traumatoloxía (SOGACOT) e xefe do Servizo de Cirurxía Ortopédica e Traumatoloxía do Hospital Povisa de Vigo durante case 40 anos. Actualmente, exerce a súa profesión no Centro Médico O Castro (Hospital Concheiro). É así mesmo vicepresidente e abandeirado da Confraría.
Pola súa banda, o popular actor vigués coñecido artisticamente como Manuel Manquiña será o encargado de portar este ano o estandarte do Cristo da Vitoria, tal e como informou esta mañá a Confraría do Cristo da Vitoria. Dáse a coincidencia que o nome orixinal do actor é Manuel Juan Francisco do Cristo da Vitoria Prieto Comesaña.
Por outra banda, tamén se deu a coñecer o nome do predicador convidado deste ano, o Ilmo. Sr. Vicario Xeneral da arquidiocese de Oviedo, o Dr. D. Jorge Juan Fernández Sangrador.
No transcurso da reunión, concretáronse ademais diversos puntos acerca da procesión do Cristo da Vitoria e os actos que a rodean. O Percorrido definitivo da Procesión está por ultimar a falta de mínimos detalles, pero é seguro que concluirá na recentemente remodelada Porta do Sol.
A presidenta da Confraría destacou a “colaboración total e o interese para que todo transcorra perfectamente” mostrado polo Concello, que colaborará de novo coa Confraría nos gastos, incluíndo a instalación dunha pantalla que se situará nas inmediacións da Concatedral a través da que se poderá seguir o descendemento da imaxe o sábado 6 de agosto a partir das 20:30 horas, e as misas do día da festividade, desde primeiras horas ata a saída en procesión. Así mesmo, a Alcaldía mostrou a súa disposición para facilitar que o descendemento do Santísimo e os actos do día posterior sexan retransmitidos en streaming a través distintos sitios web, entre eles, a páxina web da Confraría, www.cristodevigo.es.
