O 25 de novembro, no pavillón número dous do Porriño, preto de 300 persoas asistiron ao festival benéfico organizado polos equipos de Cáritas do arciprestado da Louriña e a Fundación Traballo e Dignidade, co obxectivo de recadar fondos para que ambas as organizacións poidan continuar desenvolvendo o seu labor social e caritativo en favor das persoas que se atopan en situación de vulnerabilidade.
Presentado polas xornalistas Icía Alcalde e María Díaz, o festival contou coa participación de artistas locais con recoñecemento a nivel autonómico, nacional e internacional, que colaboraron gratuitamente no evento como Uxía, Xeración “M”, Neno Lobo, Antonio Barros e Ialma, Noemí, Raúl Bem. Carla, Javi Casal “Jay Doe” ou DJ Keva. Outros deportistas e celebridades nadas no Val da Louriña uníronse ao evento vía streaming, entre eles, a nai Benita, da Fundación Traballo e Dignidade.
O festival concluíu coa participación de varios nenos e nenas da catequese que entregaron a todos os artistas unha praza de granito cos logos de ambas as entidades organizadoras, como mostra de agradecemento pola súa colaboración gratuíta.
A colaboración entre Cáritas arciprestal da Louriña e a Fundación Traballo e Dignidade é froito da pegada que a congregación das Fillas de San Xosé —paraugas da fundación— deixaron na comunidade parroquial do Porriño, onde esta comunidade relixiosa desenvolvía o seu labor social e caritativo durante os anos 70 e 80. A Fundación Traballo e Dignidade constituíuse no ano 2007 para impulsar o desenvolvemento das mulleres máis desfavorecidas a través de proxectos produtivos baseados na capacitación, a asistencia técnica e o crédito ás microempresas; ademais, forma parte da Coordinadora Estatal de Comercio Xusto e da Rede de entidades de Desenvolvemento Solidario REDES.
