Como no xa afastado 13 de maio de 1921, cando o Seminario da diocese foi consagrado ao Corazón de Xesús, cada ano os sacerdotes e seminaristas reúnense nesa mesma data para revivir aquela consagración. Recentemente converteron tamén esa ocasión en escusa para felicitar e homenaxear aos presbíteros que no ano celebren as súas vodas sacerdotais de diamante, ouro e prata.
O programa previsto, con ansia de volver á normalidade, iniciarase ás 11 da mañá cunha conferencia do teólogo Eloy Bueno, no salón de actos do seminario tudense, sobre “O presbítero nunha igrexa en sínodo”. Ás 12,30 horas, na anexa igrexa de san Francisco, celebrarase a eucaristía tras a cal ten lugar a renovación da consagración ao Corazón de Xesús ante a centenaria imaxe erixida no claustro sur do Seminario Menor. Conclúe a xornada sacerdotal cunha comida de confraternidade, ao final da cal se homenaxea, entre recordos e bromas, aos 9 sacerdotes diocesanos máis dous pertencentes a congregacións relixiosas, que celebran este ano as súas vodas sacerdotais. Sobre esas vidas calladas de servizo ministerial en moi diversas tarefas destacamos soamente algunhas.
VODAS DE DIAMANTE (60 anos)
Luís Cardalda Núñez
Ordenado no ano 1962, actualmente está adscrito á parroquia de Nosa Señora dás Neves en Vigo. Ademais do seu labor en diferentes parroquias da diocese como ecónomo ou coadxutor en Santa Cristina de Lavadores, Achas, A Cañiza ou a Inmaculada de Vigo, debe destacarse desde os inicios do seu ministerio a súa longa tarefa de misioneiro en terras de Mozambique e Brasil.
Jesús Gago Blanco
Foi na diocese, entre outros moitos encargos, un entregado vigairo xeral e vigairo de pastoral nas décadas dos oitenta e noventa. Licenciado en Filosofía e en Teoloxía foi ordenado en Comillas no ano 1963. Desde o ano 2012 é capelán na residencia Santa Marta de Vigo. Entre os seus diversos ministerios debe destacarse o ser ademais párroco do Sacro Corazón, profesor do Instituto Teolóxico de Vigo, do de Ciencias relixiosas San Agostiño e de ambos os Seminarios diocesanos.
Jaime González Couñago
Ordenado no ano 1962, agora está xubilado desde fai un lustro na residencia sacerdotal. Nada máis ser ordenado foi coadxutor da Roseira e logo de Redondela. Antes da súa xubilación exerceu con entrega exemplar desde a década dos setenta como encargado das parroquias de Pazos, Amoedo, Borbén e A Ermida, e desde 2006 tamén de Paredes. Foi ademais capelán do Fogar “Santo Domingo Savio” de Redondela. .
Victoriano Tizón Montenegro
Ordenado en 1962 en Vigo, á volta da súa etapa misioneira foi nomeado en 2002 vigairo parroquial da Inmaculada Concepción. Desde xaneiro de 1973, foi misioneiro namorado de Perú e especialmente das montañas e as xentes de Yauyos. Antes desa etapa foi arcipreste de Mondariz e párroco en Queimadelos, Meirol e Mondariz. despois de pasar por Santiago o Maior de Vigo. Foi tamén encargado das parroquias de Riofrío, Sabaxáns, Frades, Cerdeira, Ribarteme e San Cibrán.
P. José Moure Moure (salesiano)
Nacido en 1934, en Sta. María de Covelas (Ourense), ingresou aos 14 anos no seminario de Cambados e realizou o seu ideal salesiano traballando primeiro no Colexio de Ourense; ordenouse sacerdote o 29 de xuño de 1962 e actualmente cargado de anos aínda colabora na parroquia viguesa de Mª Auxiliadora. Nos 60 anos de sacerdocio exerceu o seu ministerio como profesor e en postos de diversa responsabilidade en colexios e soubo levar a alegría salesiana como educador de tempo libre e deporte.
VODAS DE OURO (50 anos)
Adolfo Fuentes Vivas
Ordenado no ano 1973, é párroco de San Fausto de Chapela desde o ano 2013. Previamente foi arcipreste de San Martiño, administrado parroquial de Angudes e Sendelle e párroco de Cequeliños e Arbo. Tras a súa ordenación foi nomeado coadxutor da nosa Señora da Soidade en Vigo. Foi tamén profesor de relixión e director espiritual nos colexios de San Xosé da Guía, Neno Jesús de Praga e As Acacias, en Vigo.
Fernando Lago Lago
Ordenado no ano 1972, desde o ano 2020 é arcipreste de Vigo-Lavadores, labor que compaxina coas súas responsabilidades como párroco de San Cristovo de Candeán (desde 2006) e administrador parroquial de Vilar de Infesta, desde 2011. Con anterioridade, fora arcipreste de Entenza e párroco das comunidades de Caldelas, Salceda, San Xurxo, Baldráns, Entenza e Tameiga. Os seus primeiros encargos sacerdotais foron os de coadxutor da parroquia de Redondela e de director espiritual do Instituto Bacharelato.
José Antonio Marzoa Rodríguez
Ordenado en Tui no ano 1973, actualmente é arcipreste de Vigo-Centro, párroco de Santiago o Maior, consiliario do movemento Cursos de Cristiandade, así como das confrarías do Apóstolo Santiago, do noso Padre Xesús do Silencio e da Virxe da Amargura. Anteriormente, fora arcipreste de Vigo-San Andrés e párroco nas comunidades de Matamá, San Juan de Ávila e Reboreda. Nada máis ser ordenado foi nomeado coadxutor, primeiro, de Baiona e, despois, do Sagrado Corazón de Xesús en Vigo. Foi profesor de Relixión no IES A Guía.
Juan Carlos Sendón Fojo:
Ordenado en Tui no ano 1973, é licenciado en Teoloxía e doutor en Dereito Canónico. Desde 1998, é o Vigairo Xudicial da diocese de Tui-Vigo, responsabilidade de Xuíz que compaxina cos seus labores como párroco de Priegue e Saiáns así como profesor do Instituto Teolóxico. Previamente estivo adscrito á parroquia de San Xosé Obreiro e Santa Rita, e impartiu clases de Relixión no Instituto “Val Miñor” de Nigrán. Antes de cursar estudos en Roma e Navarra foi capelán das Clarisas de Tui, e encargado das parroquias da Guía de Randufe, Malvas e Pexegueiro.
P. Alfredo García Fernández (claretiano) :
É párroco do Corazón de María en Vigo e Vigairo Episcopal para a Vida Consagrada. Nacido no val mineiro de Nembra de Aller (Asturias) en 1947, ingresou aos once anos no seminario menor claretiano e profesou en 1964. O 19 de marzo de 1970 recibe a ordenación sacerdotal e o seu primeiro encargo, que logo se reiterará, será o dedicarse á formación dos futuros relixiosos e á pastoral xuvenil e vocacional. Foi entre outros moitos encargos superior das comunidades claretianas de León, Ferrol, Vigo e Madrid e director do Colexio Corazón de María de Xixón.
VODAS DE PRATA (25 anos)
Jesús Martínez Carracedo:
É na actualidade o Vigairo Episcopal para Asuntos Económicos ( Ecónomo) e párroco do Sacro Corazón de Vigo, desde 2018. Recentemente foi nomeado cóengo da Santa Iglesia Catedral. Nacido en Alxén en 1972 ordenouse sacerdote en Tui en 1997. Ao ano seguinte foise a Roma para facer estudos de Pastoral Sanitaria na que se licenciou e á súa volta á diocese foi nomeado capelán do Hospital Xeral, tamén o foi do Meixoeiro, e desde 2002 foi o Delegado diocesano de Pastoral da Saúde. En 2013 a Conferencia Episcopal Española fíchalle como director do seu departamento de Pastoral da Saúde. Foi profesor, formador e Administrador do Seminario Menor de Tui e é profesor do Instituto Teolóxico de Vigo.
