O venres 5 de abril, ás 18 horas, o bispo de Tui-Vigo, Mons. Luís Quinteiro Fiuza, presidirá a eucaristía na capela da Misericordia en Baiona, para celebrar o 450 aniversario da Irmandade da Santa Casa de Paz e Misericordia da vila, converténdose así nunha das irmandades con máis longa traxectoria e tradición en Galicia. Paco Núñez, secretario da Irmandade, explica que se trata de «un momento de enorme responsabilidade e un punto de inflexión, xa que pon en valor o traballo que durante moitísimos anos a Irmandade realizou de forma altruísta e con moitísima ilusión».
A Irmandade da Santa Casa de Paz e Misericordia de Baiona nace, por iniciativa de personalidades relevantes da época, para liquidar problemas de carácter social daquel momento e de toda a historia, poñendo así en práctica as obras de misericordia que establece a Igrexa Católica —en total destácanse 14 accións caritativas ou modos de axudar ao próximo—, entre elas atender ao enfermo, dar para comer á famento e, en especial en ocasións, enterrar aos defuntos.
Na actualidade, a Irmandade da Santa Casa de Paz e Misericordia de Baiona está formada por 1.438 irmáns que colaboran de forma desinteresada nas diferentes tarefas e un cabido composto por 14 membros que, desde hai 13 anos, xestionan a irmandade. Tal e como explica Paco Núñez, «a Irmandade participa moi activamente en moitos aspectos da vida baionesa», mediante a preparación dos pasos da Semana Santa ou a elaboración das alfombras e do altar da celebración do Corpus Christi. De maneira especial, Núñez destaca, con moito orgullo, o labor que realizan, desde hai 450 anos, de dar sepultura aos defuntos.
