Do 16 ao 18 de setembro de 2022, máis de duascentas persoas da diocese de Tui-Vigo acudiron ao santuario de Fátima, en Portugal, acompañadas polo seu bispo monseñor Luís Quinteiro, grazas á peregrinación organizada pola delegación diocesana de Santuarios e do Turismo.
Cinco autobuses saíron o venres ao mediodía da cidade de Vigo rumbo a Fátima con fregueses de diferentes parroquias do territorio diocesano entre elas San Pedro de Sárdoma, Santa Marta, A nosa Señora de Fátima, Sagrado Corazón de Xesús ou San Martín de Coia. Tras a viaxe en bus e unha vez instalados nos seus respectivos hoteis, os peregrinos acudiron á chaira do santuario para participar no rezo do rosario e na procesión de fachos dese mesmo venres.
Ao día seguinte, sábado, deu comezo de maneira oficial esta peregrinación co percorrido grupal da chaira do santuario, desde a cruz alta ata a capelinha, onde o bispo, Mons. Luís Quinteiro puxo aos pés da Virxe todas as peticións que os peregrinos levan no corazón. Durante a súa intervención, o prelado de Tui-Vigo pediu para que «cada un de nós pode experimentar esa conversión, esa alegría, ese gozo que nos ofrece a Virxe. Ao volver ás nosas parroquias, ás nosas casas, aos nosos traballos, temos que vivir ese gozo, esa alegría da fe porque é o agasallo máis fermoso que podemos levar».
Durante a mañá, os peregrinos tiveron a oportunidade de achegarse ao sacramento da Reconciliación para, posteriormente, á tarde, percorrer o camiño do Via Crucis, previamente á celebración da eucaristía.
O bispo de Tui-Vigo presidiu esa misa en español na capelinha, durante a que expresou unha petición: «imos pedirlle ao Señor que sexamos fieis no pouco, que sexamos fieis no que o Señor nos regalou que é a vida, que son as nosas calidades, as nosas capacidades e os nosos talentos».
O domingo, os peregrinos acudiron ao rezo do rosario no que, durante o segundo misterio, puideron intervir dúas persoas da diocese de Tui-Vigo. Ao terminar, todos asistiron á misa internacional na chaira do santuario.
Antes de poñer rumbo a casa, compartiron unha comida fraterna co bispo de Tui-Vigo na que a peregrina máis novo, Jimena, entregou un obsequio ao pastor desta igrexa diocesana: unha casula coa imaxe da virxe de Fátima. Mons. Luís Quinteiro agradeceu a todos os peregrinos a súa participación nesta peregrinación: «e sentín moi cómodo, moi a gusto, moi unido a vós. Quizais sexa das viaxes que vivín máis entrañablemente e, sobre todo, no que puiden experimentar o marabillosos que sodes, o bos cristiáns que sodes. Cando un termina unha vida de ministerio, sempre lle parece que non fixo nada, que quedan tantas cousas aínda, pero nestes días hei sentido que recollemos a herdanza de tantas persoas que xa non están aquí —que vos bautizaron, que vos deron a Primeira Comuñón, que vos acompañaron etc.—: catequistas, xente da parroquia, padriños, avós, párrocos… Todo iso estámolo recollendo agora. Por tanto, temos que seguir transmitindo a fe porque convosco se poden aínda construír moitas cousas».
