A delegación episcopal de Pastoral Litúrxica da diocese de Tui-Vigo publicou unha nota acerca da celebración eucarística, mentres non teñen lugar a consagración episcopal e toma de posesión do bispo electo, Antonio Valín Valdés.
Na nota, a delegación explica que, na pregaria eucarística, rezarase encomendando «ao noso papa Francisco e ao bispo-administrador apostólico Luís» e advirten de que non ha de nomearse ao bispo electo nesta parte da celebración, pero si na oración dos fieis, momento no que se ha de pedir polo «bispo electo Antonio». Para iso, ofrece a parroquias, congregacións, presbiterio e fregueses en xeral un texto para a oración dos fieis —en español e galego—, pedindo polo bispo electo, Antonio Valín Valdés.
Na mañá do sábado 25 de maio, a Nunciatura Apostólica en España anunciou que o novo bispo da diocese de Tui-Vigo será o sacerdote ribadense Antonio Valín Valdés, ata o de agora vicario xeneral da diocese de Mondoñedo-Ferrol.
