O venres, 1 de decembro, a dirección e as persoas usuarias do Fogar e Clínica Santo Rafael de Vigo celebraron o Día da Discapacidade coa inauguración do tradicional Belén do Nadal que o centro monta desde hai máis de 70 anos e coa apertura do mercado no que se mostran e poñen á venda os traballos realizados polos usuarios dos talleres da área Ocupacional durante todo o ano
O presidente da Confederación de Empresarios de Pontevedra, Jorge Cebrerios, exerceu como padriño desta celebración e compartiu coas persoas usuarias a lectura dun manifesto no que se puxo en valor a necesidade de seguir traballando para a integración no mundo laboral das persoas con discapacidade intelectual e destacouse que o emprego é un medio fundamental para alcanzar unha vida plena, autónoma e independente.
Tras a lectura do manifesto, realizou unha visita ao Belén e ao mercado e compartiu un café cun grupo de usuarios que lle trasladaron as súas inquietudes sobre o acceso á contorna laboral.
Belén e mercado
O Belén, que permanecerá aberto ao público ata o próximo 6 de xaneiro, en horario de 11.00 horas a 13.30 horas e de 17.00 horas a 20.00 horas, ocupa unha superficie que supera os 40 metros cadrados e conta con máis de 100 figuras que representan as escenas típicas deste tipo de recreacións.
Esta representación é posible grazas ao intenso labor desenvolvido polo persoal e os usuarios de todos os talleres da área Ocupacional que levan meses traballando na súa preparación, deseñando os diferentes escenarios, seleccionando e adecuando as figuras e preparando toda pártea técnica que permite que este Belén sexa cada ano diferente e único.
Ademais, do nacemento e a adoración dos Reis Magos, inclúe escenas cotiás, representacións de diferentes oficios, paisaxes de ríos, montañas e desertos, pontes, camiños e vivendas.
Unha das principais características deste Belén é que nunca é igual e cada ano o equipo responsable deste traballo esfórzase por innovar e incluír novidades técnicas e artísticas que o fagan máis atractivo. En concreto, nesta ocasión incluíronse unhas ovellas realizadas no taller de cerámica, unhas nubes de poliespán do taller activados/estimulados e unha nova jaima feita polo taller de coiro.
Ademais, este ano tamén se reformou o espazo do Belén e creouse un novo acceso independente desde o exterior do edificio Santo Rafael que facilitará as visitas.
Na sala contigua ao Belén, nun espazo completamente renovado, os visitantes poderán acceder tamén ao mercado no que atoparán diversos artigos do Nadal, así como actividades manuais de diferente tipoloxía como colgantes, lapiseiros, marcapáxinas, chaveiros ou diversos artigos realizados polo taller de coiro que está rexistrado como Taller de Artesanía de Galicia pola Xunta de Galicia.
Este mercado, ademais de dar a coñecer os traballos que se fan no centro, ten por obxectivo a habilitación profesional das persoas usuarias, xa que son eles os que realizan os inventarios e as vendas coma se tratásese dunha tenda na rúa, buscando así posibilidades de futuras insercións laborais.
