O sábado 14 de xaneiro, de 17 a 19 horas, nos locais parroquiais da nosa Señora do Rocío, as delegacións de Catequeses e Pastoral Familiar convocan o segundo encontro de formación e orientación para os axentes de pastoral que coordinan «Escolas de Familias» nas súas respectivas parroquias de orixe —é dicir, acompañando ás familias que acudan a estes encontros mensuais para reflexionar sobre a tarefa educativa que se realiza cos fillos e fillas—. Para asistir a esta xornada de formación é necesario inscribirse a través do correo electrónico pfamiliar@diocesetuivigo.org.
As «escolas de familias» son espazos de información, formación e reflexión sobre aspectos relacionados coas funcións parentais, pensados para desenvolverse no ámbito da comunidade parroquial. Polo que, para poder levar a cabo esta iniciativa proposta polas delegacións diocesanas de Catequeses e Pastoral Familiar, resulta indispensable formar ás persoas responsables de implementar, cada mes, o plan de formación baseado no autocoñecemento, a xestión emocional e a comunicación. O matrimonio formado por Antonio e Patricia pilota esta iniciativa diocesana na que, tal e como o expresan ambos, «non falamos de docencia nin de ensinar unha fórmula máxica, posto que hai tantas fórmulas como fogares. Falamos de compartir, dar e recibir apoio, e aprender no camiño os un cos outros».
Na actualidade, xa son sete as parroquias que decidiron sumarse a esta iniciativa que consta de un dobre carácter comunitario: por unha banda, diocesano, xa que serán as delegacións as encargadas de acompañar e formar a todas aquelas parroquias interesadas nesta formación para familias; e, por outra banda, parroquial, pois as familias interesadas en asistir a estes encontros mensuais deberán facelo nas súas parroquias de orixe. En definitiva, trátase dun proxecto para toda a Igrexa diocesana que queira afianzar a pastoral familiar no seu ámbito concreto.
