O sábado 22 outubro, un total de 225 persoas participaron no curso rexional que organizou o secretariado interdiocesano de Pastoral da Saúde de Galicia en Santiago de Compostela sobre «Bioética e compromiso/alternativa cristiá», que impartiu o presidente do colexio médico de Madrid, Dr. Manuel Martínez-Sellés, ofrecendo unha postura sincera ante a actual cultura da morte e do descarte. Ademais dos axentes de pastoral da saúde procedentes de parroquias ou delegacións diocesanas, tamén participou a Hospitalidade de Lurdes, xunto a diversas asociacións e congregacións relixiosas que se dedican á atención e coidado dos enfermos. Da diocese de Tui-Vigo, asistiron 45 axentes vinculados ao ámbito da pastoral da saúde.
Pola tarde, tras a comida, os asistentes ao curso participaron na celebración da eucaristía, presidida polo arcebispo Mons. Julián Barrio, na catedral de Santiago para gañar o xubileo neste ano santo compostelán. Nesta ocasión, o encargado de realizar a ofrenda ao Apóstolo foi o director do secretariado interdiocesano de Pastoral da Saúde e delegado da diocese de Tui-Vigo, Benito Rodríguez.
A través deste curso, o cinco delegacións de Pastoral da Saúde da provincia eclesiástica de Galicia quixeron comezar o novo curso pastoral contaxiando entusiasmo, co desexo de que se creen novo equipos de Pastoral da Saúde nas parroquias que, á súa vez, reúnan esforzos para traballar en equipo coas delegacións diocesanas.
Desde o secretariado interdiocesano de Pastoral da Saúde, agradecen a colaboración de todas aquelas institucións e persoas que fixeron posible que o encontro transcorrese con normalidade e puntualidade. Neste sentido, destacan o bo ambiente creado entre os asistentes, así como o interese por aprender e profundar.
