O pasado sábado, 24 de setembro, a delegación de Pastoral Familiar da diocese de Tui-Vigo organizou un Encontro Diocesano de Familias co que dar comezo a este curso pastoral, marcado por clausúraa do Ano «Familia Amoris Laetitia», que o papa Francisco convoco en decembro de 2020 con motivo do quinto aniversario da publicación da súa segunda exhortación apostólica, Amoris Laetitia, sobre a alegría do amor.
O Seminario Menor de Tui foi o lugar de encontro no que os participantes tiveron a oportunidade de reflexionar acerca da situación actual que viven as familias e que, posteriormente, materializaron nun total de sete peticións proclamadas durante a celebración eucarística. Ao termo da misa, houbo un momento de confraternización e actividade ao aire libre no Monte Aloia, onde transcorreu a comida.
Ademais deste espazo de convivencia para as diferentes realidades familiares da diocese, a delegación de Pastoral Familiar aproveitou para presentar a exposición «Amoris Laetitia», que trata de resumir o contido do texto homónimo publicado polo papa Francisco, conxugando tamén testemuños reais de familias procedentes das cinco dioceses que compoñen a provincia eclesiástica de Galicia.
