O vindeiro xoves 14 de xullo, ás 20:45 horas, a historiadora de orixe viguesa, María do Camiño Viana, presentará nos locais parroquiais de San Antonio da Florida —en Vigo— o seu primeiro libro «María, una obra maestra. La Madre de Dios a través del arte» publicado en outubro de 2021 pola editorial Nova Eva.
Sinopse do libro
María é a antítese de todo o que hoxe é menosprezado: é virxe e é nai. A súa felicidade pasa polo baleirado de si mesma para estar chea de Deus. A Virxe, como nova Eva, acolleu no seu seo a Cristo, que restituíu a comuñón plena con Deus. Por iso é a muller plena, forte e «empoderada» no sentido máis auténtico da palabra, porque o seu poder reside na humildade. É, ademais, a muller máis representada na arte ao longo dos séculos.
A beleza da arte é a materialización da obra perfecta que Deus fixo na súa Nai e que busca realizar en nós. Este libro propón un achegamento á persoa real da Virxe María mediante un diálogo cunha selección de obras mestras. En palabras da súa autora, «a través da arte podemos tocar a María, acariñar o seu misterio, participar da súa dozura, beber da súa esperanza confiada. A intención é pasar dunha contemplación pasiva das obras propostas a unha experiencia estética que nos permita sentir e saber máis próxima á Virxe para poder penetrar no seu corazón cheo de amor a Deus e a todos os homes».
Sobre a autora
María do Camiño Viana (Vigo, 1995) é historiadora da arte pola Universidade de Santiago de Compostela e pedagoga polo Conservatorio Superior de Música de Vigo. Desempeñouse no ámbito da comunicación institucional como directora da Oficina de Información Diocesana do Bispado de Tui-Vigo, e tamén como redactora e coordinadora en plataformas de divulgación cultural.
