Un centenar de mozos e mozas da diocese de Tui-Vigo participarán como voluntarios na PEJ

Do 3 ao 7 de agosto de 2022, en Santiago de Compostela, un centenar de mozos e mozas de distintas realidades da diocese de Tui-Vigo participarán na Peregrinación Europea de Mozos e Mozas (PEJ) como voluntarios encargados de acoller a máis de 10 mil peregrinos de España e Europa nun gran encontro para celebrar o Ano Santo Compostelán, que organizan a arquidiocese de Santiago de Compostela, en colaboración coa Subcomisión de Mocidade e Infancia da Conferencia Episcopal Española.

O pasado sábado, 2 de xullo, todos os voluntarios de Galicia reuníronse por última vez no Seminario Menor de Belvís (Santiago de Compostela) para ter o seu último encontro formativo do ano previo á PEJ. Segundo explica a viguesa Elena Fernández, unha da coordinadoras da área de voluntariado, esta será unha experiencia cargada de actividades —catequeses, concertos, talleres, etc.—, que contribuirá ao crecemento espiritual de todos os mozos participantes, xa sexan peregrinos ou voluntarios, dispostos a construírse e compartir momentos con outros mozos de toda Europa.

Na Provincia Eclesiástica de Galicia, formada polas dioceses de Santiago de Compostela, Mondoñedo-Ferrol, Tui-Vigo, Lugo e Ourense, convidar os mozos a participar como voluntarios para acoller e acompañar aos peregrinos que chegarán a Compostela peregrinando polos diferentes camiños. Na actualidade, cóntase cun total de 431 voluntarios rexistrados que pertencen ás cinco dioceses galegas: 222 da Arquidiocese de Santiago de Compostela; 97 da diocese de Tui-Vigo; 44 de Mondoñedo-Ferrol; 21 de Lugo; e 20 de Ourense; os 27 mozos restantes pertencen ao colexio católico San Xosé de Cluny.

Cada Ano Santo, desde 1989 tras a visita do papa San Xoán Paulo II a Santiago con motivo da Xornada Mundial da Mocidade —que se realizaba por segunda vez fóra de Roma—, a arquidiocese de Santiago de Compostela celebrou unha Peregrinación Europea de Mozas que, co paso dos anos, foi crecendo en participación. Nun primeiro momento, a celebración da PEJ estaba prevista para agosto de 2021, pero tivo que aprazarse debido ás consecuencias da pandemia da covid-19 e grazas á prórroga concedida polo papa Francisco á arquidiocese compostelá para celebrar o Ano Santo.