Unha expedición da Amazonía visita Galicia do 5 ao 9 de xuño para alertar dos perigos que padece o gran “pulmón do mundo”.
Fernando López sj, Arizete Miranda e Raimunda Paixao, son os membros do Equipo Itinerante da Rede Eclesial Panamazónica (REPAM) que estarán na visita.
O futuro do planeta e dos pobos amazónicos atópase ameazado pola incursión nos seus territorios de megaempresas que atentan contra a sustentabilidade ambiental e contra os dereitos humanos.
Galicia, por medio das súas delegacións en Vigo, Santiago de Compostela e A Coruña, acollerá a visita de tres membros do Equipo Itinerante da REPAM e do Consello Indixenista Misioneiro (CIMI), organización vinculada á Compañía de Xesús e que escoita, acompaña e defende os dereitos dos pobos amazónicos. Trátase do xesuíta canario Fernando López, natural da Palma, e con máis de 20 anos de traballo como misioneiro nesa parte do mundo, Arizete Miranda, muller indíxena brasileira e relixiosa e Raimunda Paixao, misioneira do Equipo Itinerante ao que pertencen os tres.
A visita enmárcase dentro do Reto Amazonía que este ano comparten as delegacións galegas, tanto para a sensibilización sobre esta realidade como co financiamento de diversos proxectos educativos, humanitarios e de saúde na zona, así como na defensa dos dereitos da etnia Sateré Mawé da Amazonía brasileira.
O Equipo itinerante creouse en 1998 grazas a Claudio Perani sj, o seu pai inspirador, que foi o primeiro superior da rexión amazónica. O proxecto naceu de escóitaa atenta dos clamores, desexos e esperanzas dos pobos amazónicos. E así, xunto a estes pobos, o Equipo Itinerante vai atopando a mellor maneira de colocarse ao servizo da vida, da humanización das relacións e da promoción da xustiza, tecendo redes entre as
persoas, comunidades, pobos e institucións. O traballo do equipo itinerante céntrase naqueles lugares da Amazonía onde se atopan os pobos excluídos, onde os dereitos humanos son vulnerados, e onde o socio-ambiental está máis ameazado.
A presenza de Fernando, Arizeti e Raimunda servirá tamén para facer balance dos ecos do Sínodo da Amazonía, celebrado en Roma en outubro de 2019, convocado polo Papa Francisco, no que se abordou non só a evanxelización dese inmenso territorio, senón tamén os seus problemas sociais, económicos e ecolóxicos.
