O venres 1 de abril, ás 20 horas, no Seminario Maior de Vigo, a delegación de Medios de Comunicación Social da diocese de Tui-Vigo convídate a participar no segundo encontro formativo sobre comunicación eclesial, impartido polo director da Oficina de Información da Conferencia Episcopal Española, José Gabriel Beira Beorlegui. «Comuníca(te), na Nova Evanxelización» é o lema escollido para esta primeira edición do Curso de Comunicación para a Nova Evanxelización.
Co obxectivo de espertar o sentir comunicador de todos os laicos e sacerdotes, desde a delegación convidan a nomear a un correspondente de medios en cada comunidade parroquial, delegación diocesana, movemento ou asociación laical, que poida dar a coñecer a verdade do que a Igrexa é e o que a Igrexa fai. Por iso, animan a asistir a este segundo encontro independentemente de que se participou ou non no encontro anterior o pasado 4 de marzo.
Tal e como explican desde a delegación, o título quere chamar á acción da persoa para comunicar a súa fe, pero tamén a fe da Igrexa á que representa —unha diocese, delegación, movemento, parroquia, etc.—, empregando os medios actuais —redes sociais, podcast, sites webs…— como canles para a Nova Evanxelización. Neste sentido, o obxectivo é conseguir que os participantes tomen conciencia dos eu “ser comunicadores eclesiais”, é dicir, representantes da Igrexa tanto nas súas comunidades de referencia como ante toda a sociedade en xeral.
Estes dous encontros formativos co director da Oficina de Información da CEE son a materialización dun dos obxectivos específicos perfilados no Plan Pastoral 2021-2022 —desenvolver un curso de comunicación institucional e portavocía para os axentes de pastoral—, un paso máis para promover unha maior participación e implicación laical na vida e a comunicación da Igrexa diocesana.
