Este venres, 2 de xullo, ás 20:30 hrs., a parroquia viguesa Nosa Señora do Rocío organiza un concerto-oración co cantautor zamorano de música católica, Rogelio Cabado, para preparar aos 20 mozos e mozas que, ao día seguinte, sábado 3 de xullo, recibirán o sacramento da Confirmación. A entrada será libre pero o aforo estará limitado para poder cumprir cos protocolos establecidos polas autoridades sanitarias.
Estes mozos e mozas achegaranse a este sacramento co que finalizan a súa iniciación cristiá nunha celebración conxunta que reúne a confirmandos e confirmandas das parroquias da nosa Señora do Rocío (6), San Martiño de Coia (10) e A nosa Señora do Carmen (4). Antes da Confirmación, haberá unha preparación previa: o xoves, mediante a celebración do sacramento da Reconciliación; o venres, con este concerto-oración que evocará ao Espírito Santo, a san Xosé e á familia con motivo do Ano «Familia Amoris Laetitia» convocado polo papa Francisco o pasado 8 de decembro de 2020.
Sobre o cantautor
Rogelio Cabado é pai de familia, profesor e cantautor. O seu primeiro disco testemuñal viu a luz en 1995, pero vén compoñendo desde que tiña quince anos. Conta cunha selección de máis de 300 cancións editadas en 20 CD’s aos que se suman a colaboración na edición doutros discos de música froito de varios proxectos solidarios e achegas poéticas e literarias.
Percorreu centos de lugares en recitais, concertos, festivais, encontros coa mocidade e os maiores. O fío condutor das súas cancións son un canto á vida e a esperanza, desde a súa visión cristiá e amor á Igrexa, de maneira comprometida e vivencial. As súas letras son a expresión máis xenuína da súa interioridade e a súa experiencia persoal da misericordia de Deus Pai, polo que se sente amado, impulsado e comprometido, como pai de familia, cara a cantos lle rodean.
