O domingo, 21 de xuño, a parroquia de San Xurxo de Saiáns conmemorou 100 anos da reconstrución do seu templo cunha eucaristía presidida polo bispo de Tui-Vigo, Luís Quinteiro Fiuza, que inicialmente estaba prevista para abril do 2020 e que a pandemia da Covid-19 obrigou a pospoñer.
Durante a celebración, o bispo de Tui-Vigo agradeceu o traballo dunha das comunidades cristiás máis rurais do concello de Vigo que, segundo o último censo municipal, conta con 3.814 habitantes. Así mesmo, exhortou aos presentes para “estar espertos” como crentes para afrontar as dificultades xurdidas pola pandemia con esperanza; esa esperanza que se manifesta nos novos presentes nas nosas familias e comunidades.
Juan Carlos Sendón, párroco de San Xurxo de Saiáns, tamén manifestou o seu agradecemento ás autoridades presentes —Marta Fdez. Tapias, delegada territorial da Xunta de Galicia, Anxo Rivas, concelleiro de Vigo, e Jorge González, presidente da Asociación de Veciños de Saiáns— que, ao termo da misa e xunto ao bispo, descubriron o cadro conmemorativo creado para celebrar esta efeméride.
San Xurxo de Saiáns foi constituída parroquia o 3 de decembro de 1998 polo bispo emérito José Diéguez Reboredo para desmembrarse así da parroquia de San Miguel de Oia e contribuír “ao ben espiritual dos propios fieis, é dicir, para que poidan recibir mellor atención pastoral”, explica o decreto publicado no Boletín Oficial do Bispado de 1998.
